الفيوم
ورقة التوت الخضره اللي نايمه في حضن الصحراء الغربيه
واللي بيربطها بالنيل فرع الورقه اللي بيربط اي ورقه شجر بالساق
محافظه تجمع بين بيئات مختلفه
البيئه الزراعيه.... عباره عن منخفض اخضر ف قلب الصحرا
الصحراويه.... اطرافها طبعا عباره عن صحراء
الساحليه .... بحيره قارون نايمه في شمال المحافظه
***
قريتي
هي تصغير للفيوم
فيها نفس الارض الزراعيه
ونفس البيئه اللي قريبه من الصحرا بصخورها وجمال الطبيعه فيها
والميه اللي بتتمثل في الوادي
باهلها الناس الطيبين
منتهي الطيبه والطبيعيه ناس عالفطره
مشاكلهم ابسط من البساطه
عايشين كانهم بيت واحد
كل الناس تعرف بعض
وكل الاطفال بيلعبوا مع بعض
الوادي
لا هو ترعه
ولا بحر
ولا تقدر تقول عليه غير الوادي
هو اسمه كده
مجري مائي في ارض منخفضه
تتدرج غي الارتفاع كلما بعدنا عن الميه علي هيئة جروف بينها منحدرات
وعلي الوادي
كنا طبعا بنجري ونلعب ونعمل طيارات ونطيرها
وندي ظهرنا للترعه قصدي للوادي وننزل بظهرنا
واحيانا نتمشي علي شط الميه
واوقات كنا بناخد كاسيت ولب وسوداني
ونروح نسهر عالوادي تحت القمرا في عز الصيف
اللي ينعس يناااااااااااااااااام
لحد ما تشقشق الشمس
وشكل الميه بيقبقي مالوش حل الصبح
وعلي الوادي
كان فيه صخره
صخره كبيره بقيت من الجروف العاليه
وفضلت وحدها واقفه ف المنطقه المنخفضه
ارتفاعها من ناحيه الميه اربع او خمس امتار
ومن الناحيه التانيه اقل شويه وفيه اماكن ممكن نطلع منها فوق الصخره
كانت كبيره وانا صغير
وكل اما انا اكبر هي تصغر
تصغر بفعل الزمن بيقع قطع منها
اخويا الكبير قاللي انه وهو صغير كان بيلعب كوره فوقيها
لكن انا علي ايامي كانت صغرت بحيث يادوب
نطلع فوقها ونلعب ونقعد نحكي وفي شم النسيم
لما كنا صغيرين قوي كانوا الكبار بيروحوا الشلالات
كنا احنا بناخد البيض الملون ونروح عالصخره والوادي
الصخره انا كبرت
وهي صغرت صغرت لحد اخر مره شفتها كان اغلبها وقع
بس كان لسه فيه جزء ممكن نطلع فوقه بس ما طلعتش
للاسف مطلعتش اخر مره كنت ممكن اطلعها
لان بعد اما جيت هنا عرفت انهم وقعوها
واستصلحوا الارض مكانها
بسهوله الزمن بمساعده الناس قدر يشوه زكرياتي
دلوقت مش هقدر اقف فوق الصخره واحدف طوب ف الوادي
مش هقف فوق الصخره واغني لاسراب الطيور المهاجره
واللي بتعدي من جمب الميه وتنزل تشرب وتلعب وتكمل رحلتها
مش هقولها " يا حمام اعملي حبل لا اقول لابوك "
وسبحان الله
كانت بتستجيب لغنايا وتقوم مرصوصه بشكل طابور من صف او اتنين
يمكن دا تلقائي بدون غنايا
بس كنا بنعتقد انها بتسمع كلامنا
مكنش ينفع يعدي يوم من غير ما نروح عالوادي
حتي لما كبرت وانا ف ثانوي
كنت باخد كتبي واروح ازاكر عالوادي
وكان بيجيلي اصحابي من اللي معندهمش وادي
ونروح نزاكر سوا عالوادي
ودايما كانت بتتقلب فسحه وننسي المزاكره
بفرجهم علي معالم المنطقه وننفض للمزاكره هي هتطير
ولما كنا بنجيب كاميرا
ونقعد نتصور عالوادي
وفوق الصخره
زكريات
مش عارف هرجع الاقي الاماكن دي زي ماهي فاكراني
ولا سنتين من الغربه كفيله بتشويه اجمل زكرياتي
خايف ارجع الاقي الاماكن نسيتني
بلا مزاكرة بلا وجع قلب يلا نلعب احسن
ردحذفيااااااااااااااااه يامحمد قربتني من المكان اوي
بس صعب اوي تكون بتحب مكان وتلاقي معالمه اتمحت
تيجي تحكي لعيالك يقولو ان ابوهم اتجنن
ان شاء الله هترجع وهتلاقي اغلب الحاجات موجوده والذكري في القلب مش بالعين
هههههههههههه
ردحذفيبنى متفكرنيش بالفيوم كانت احلى سنه واللهى
الصوره دى على فكره القطر كان بيعدى عليهاا
انا فين بقىىى ماطلعتش ف الصوره ليه
الله كلامك عن الفيوم والوادى حببنى فيها
ردحذفوصفك رقيق جدا وبعدين متزعلش على الذكريات
والاماكن اللى الزمن شوهها والافضل انك تفضل محتفظ
جواك بصورة للمكان قبل ما الزمن او الناس او
الظروف تجور عليه
الذكريات الحلوة بتبقى مدفونه جوانا
ترجع بالسلامه بس متكونش انت اللى نسيت الاماكن
بوست جميل جدااااااااااااااااااااا
انا مصمم اجيلك الفيوم يابو العريف فى الأجازه فى الصيف ده انشاء الله .. اجيب معايا ايه ؟؟
ردحذفالصورة جميلة
ردحذفانا اول مره رحت الفيوم كان بالقطر وطول الطريق كنت ساكته كنت بتفرج على الطريق وكنت بتمنى القطر يمشى بسرعه اوى عشان اشوف اكتر لكن والله لما وصلت للمنطقه دى اتمنيت ان القطر يقف اتأمل جمالها وكل يوم بروح الكليه بالقطر وبتمنى نفس الامنيه امشى فى المكان ده
ردحذفما أجمل أن تحمل معك دائما ذكرياتك الجميله ولكن الحياه تضطرك أحيانا لأن تنسى كل شىء
ردحذف